ဆု္႓ီး႓ၚ ေဍ ဆု္ဖံင္ေဖႜ၀္ဟွင္.

ဍဳံ လုက္ဖုိင္ ဆာ.မြာဲအွ္မႝီဟ္ဆုိဒ္ေဖါဟ္လု္ဖး မု္အင္း-အွ္-ေလ၀္ထာင္ကုက္မာ
႓းသာေ၀့ဍး ကု္လုံ့ကါင္ကာဆု္မာ ယွဴးယွဴး႓ါ႓ါဏွ္ထၞာ.လွ္။ ေ႓့မု္အွ္႓းယွဴးခႜိင္းသုိ၀္အု္ဟွင္. အင္းဃွဴ.သီးေ၀့ဍး ေသႝာ၀့္(လမ္းစဥ္)အးမိင္အးစိင္ဏွ္လွ္။
အင္းဃွဴးသီးေ၀့ေသႝာ၀့္အု္ခါ့ဏွ္ဍ၀္ လင္ဟု္လင္မာပ်ဳက္ဆု္သယ္အွ္ေ၀့
အးမိင္အးစိင္တယ္ဏွ္သီး ဍး႓းသီးေ၀့ဍးလွ္။ ကဲထင္းဍးေ၀့ ထံင္. မု္ကဲထင္းလ္ုမိင္ေဟွ၀္ လု္မိင္ေဟွ၀္ မု္အွ္႓းသာယွဴးယွဴးခႜိင္းခႜိင္း ဆုိဒ္ကုိ၀္ဆုိဒ္ေဍဏွ္ ဆု္႓ီး႓ၚဟွင္. ေဍဆု္ဖံင္ေဖႜ၀္ဟွင္.ဏွ္အုိ၀္ မု္႓းေဏ၀္၀ီ.ေ၀့ဍး လု္ယာ့ထုက္လွ္ဏွ္ တုင္.ပါင္အု္သာ မု္႓းအွ္ေ၀့တယ္ဏွ္လွ္။ အု္ဟွာင္.အု္က်ံင္းသယ္ဏွ္ဟွး------

၁။ (က) သာေ၀့ဆု္႓ီး႓ၚအု္ဟွင္.
မႝီ.သယ္သီးယုိ၀္ဏွ္ သာဆု္႓ီး႓ၚ ေအေဏ၀္.ေအအွ္မ အု္သာမုိင့္အွ္ေ၀့မု္ကဲတာ. ဍဳံလုက္ၿဒပ္ခု္သုိ၀္ ဆု္မုက္လာသယ္ဏွ္အုိ၀္ အု္သီးေ၀့ စာသုိင့္က်ဳိင္က်၀္ ကု္ယုိင့္ကု္ယ၀့္
ထင္းသာ မု္ကဲတယ္မြာဲ႓ုိ၀္လွ္။ ေဍ အု္သီးေ၀့သာအု္ဟွင္.ဆု္႓ီး႓ၚေအးလု္အွ္႓းစာ္႓ုိ၀္ ဍဳံလုက္ေခါဟ္ဍာယုိ၀္ လင္ဟု္သာကုဲအဲဍဳိ၀္ဆု္အွ္ေ၀့ဏင္.မိင္လုိင္ေအးလွ္။

(ခ) ၿဒပ္ခု္သုိ၀္ေ၀့ဆု္႓ီး႓ၚအု္ဟွင္.
မႝီ.သယ္သီးယုိ၀္ဏွ္ အု္သာမုိင္အွ္ဟွံင္ ဍဳံလုက္ေ၀့ၿဒပ္ခု္သုုိ၀္ ဆု္မုက္လာသယ္ဏွ္အုိ၀္မု္စာသုိင့္က်ဳိင္က်၀္ဟွင္. ႓းဆာင္ေဍဆးအင္းဆးအ၀္
ဆု္ဖၚဆု္မာသယ္ဏွ္ အွ္ေ၀့အးကု္ဍးလွ္။ ဆု္ဟု္လ၀္ဆု္ ဆးအင္းဆးအ၀္အု္ဟွင္. ၿဒပ္ခု္သုိ၀္သယ္လု္ဖးဏွ္ ဆု္႓ီး႓ၚေအလု္အွ္႓းစာ္႓ုိ၀္ သာမုိင့္လာ.ဏင့္သီး အု္ဂုဏ္အူ္တာမု္အွ္ေ၀့ထံင္ခ၀့္လဲ။
(ဂ) ဂုဏ္ေဒၢတ္ဆု္႓ီး႓ၚအု္ဟွင္.
ဟု္မု္႓းဖံင္းခုိင္ထာင္ ဟု္ဆုိဒ္႓ံင္ဂုဏ္ေဒၢတ္က်ာ္ၾသီ.အု္ဟွင္. ေအလု္ေဏ၀္.
ဆု္႓ီး႓ၚ႓းစာ္႓ုိ၀္ ဆုိဒ္႓ံင္မု္လင္လာ္ ၀ိက္ၿပဳဂ္ခြိက္သာကဲတယ္လွ္။ စင္.႓ုိ၀္ ဂုဏ္
ေဒၢတ္က်ာ္ၾသီ.ဆု္႓ီး႓ၚဏွ္သီး မု္႓းအွ္ေ၀့ ယွဴးယွဴးခႜိင္းခႜိင္းမုက္မုက္လာလာ ေ႓့မု္ကဲသုိ၀္အု္ဟွင္. မြာဲအု္ကြာအွ္ေဍာဟ္ေ၀့ လု္မိင္ေဆ၀္.လွ္။

၂။ (က) ပညာေ၀့ဆု္ဖံင္ေဖႜ၀္
ကဲထင္းမႝီ.ဖ၀္.စာ္႓ုိ၀္ ဆုိဒ္ေဖါဟ္လု္ဆုိဒ္ဏွ္ေအအွ္႓းသာ ထုင္းထုင္း(ထုိဟ္ထုိဟ္) ထ၀့္ထ၀့္ေဆ၀္.သၞဳိ၀္ ပညာေ၀့ဆု္ဖံင္ေဖႜ၀္ဏွ္ မု္႓းအွ္တယ္လွ္။ ကဲထင္းဆုိဒ္ေဖါဟ္လု္
ဆုိဒ္ယုဂ္ဆု္ဆုိဒ္လိက္လာဲေဍ ဆု္ဃွီ.လာသယ္လ္ဖး ေ႓့မု္ဟွဳင္.ခုိင့္စီကႜာထင္းထ၀့္
သုိ၀္အု္ဟွင္. မာေလာဟ္ထုဂ္ဖႜဟ္ထင္း ေဏ၀္။ဆု္ပႜယ္တ၀္ထီ့ဆာအွ္ေအးသၞဳိ၀္စာ္႓ုိ၀္ ဆ္ုဖံင္ေဖႜ၀္ ဟု္လ၀္ဆု္ဏွ္ အု္ခ၀့္ပု္ယ၀့္အွ္ေ၀့ဏင္.မိင္လုိင္ေအးလွ္။

(ခ) ဍံင္ထုိ၀္သာဘာ.သာ့ဆု္ဖံင္ေဖႜ၀္
လ၀္ေဍ ႏုိ၀္ဏွ္ဟွး------
ေဏ၀္.ဆု္ဖံင္ေဖႜ၀္ယုဂ္ဖ၀္. ကုိ၀္႓ႜင္ကုိ၀္တာ(ကု္႓ႜင္က္ုထာ.) ဟွဳိင့္႓းလာ.ဏင့္သီး အင္းဃွဴ.ေယာ၀္.ထာင္ ဍးစူးဏင္းထာ္ (လက္ေတြ.) လု္႓ႜင္ေဏ၀္.ေ၀့ဆု္ဖံင္ေဖႜ၀္ ထီ့ခါန္. ေဍဆုိဒ္ဆသယ္ဏွ္ဟွး ခါေ၀့ တု္ယွာ.တယ္လွ္။ ေဏ၀္. ဆု္ဖံင္ေဖႜ၀္ထီ့ခါန္. ေဍဆုိဒ္ေဖါဟ္သယ္သီးအု္ဟွင္.ဏွ္ဟွး ပညာဟွင္.ဆု္ဖံင္ေဖႜ၀္ေအအွ္စာ္႓ုိ၀္ ဘာ.သာခ၀္ဏွ္သီး ဆု္ဖံင္ေဖႜ၀္မု္႓းအွ္ေ၀့ေဆ၀္.လွ္။
႓းဏွ္လဲစာ္႓ုိ၀္ ဆု္လု္ဘာ.သာ့သီးယုိ၀္ ဏွ္အု္ိ၀္ ဆုိဒ္ကုိ၀္ဆုိဒ္ေဍအု္ဟွင္. လု္အု္ေဟွ၀္ခ၀့္ ပု္ယုံ့ေဖွ္လင့္ေ၀့ ဖုိင္သာကဲဏွ္တာ. ဍံင္ထုိ၀္သာေဏ၀္.ဆု္ဖံင္ေဖႜ၀္မႝီ.
ကုိ၀္ဟွာေဍသယ္သီးလ္ဖးဏွ္အုိ၀္ ပါေဍာဟ္ယုဂ္ယာန္.သီးေ၀့အ္ုသီးဘာ.သာ့ဏွ္အု္
ေခါဟ္က်ံင္ ကဲထင္းေ၀့မႝီ.ေဟွ၀္အြာဏွ္လွ္။ မႝီ.ေဟွ၀္အြာအွ္အးထီ့ခါန္.ဏွ္ မြာဲအု္ဖံင္
ေဖႜ၀္ထုက္ လု္ထီ့ခါန္.လု္ခါန္.အုိ၀္တာ. မု္ဟွုဳင္.ခုိင့္ေ၀့အု္ေခါဟ္က်ံင္ဏွ္လွ္။

(ဂ) ဆု္ဃွီ့ဆု္လာဆု္ဖံင္ေဖႜ၀္
ဆု္လ၀္ဆုိ၀္၀ယ္ ဆု္ခႜာင္အွ္လု္ဖႜဳံး--- ဖႜဳံယွင္လင္မိင္၊ ေခ်န္.လင္မိင္ ေ႓့ဏွ္သုိ၀္ ထံင္မူ.လု္ဏီအု္ခါ့ယို၀္သီးမ လ၀္သီးေ၀့ဍး ကႜဳ္ဍာ္လွ္။ လာ.ဏင့္႓ုိ၀္သီး ဆု္လ၀္ဆ္ု
ေ႓့ဏွ္သုိ၀္လု္ဖး မြာဲလု္ေသွ္ယာ့႓းေ၀့ဖႜဳံယွင္ေဖါဟ္သီး အု္ဆု္ဃွီ့ဆု္လာဏွ္လ၀့္႓းဍံင္။ ဆံင္းမံင္းေယာ၀္.ေအထီ့ဆာလု္ဖုိင့္ အွ္ေကာ၀္ၾကင္ေခါဟ္ဍာ ဆုိဒ္ကုိ၀္ဆုိဒ္ေဍသယ္သီးဏွ္ အု္ဆုိဒ္ေဍအု္ဆု္ဃွီ့လာ အွ္ဍးဆု္သာအု္ဆုက္ဆုက္ထၞာ.လွ္။
လာ.ဏင့္သီး ဆု္ဃွီ့လာသယ္လု္ဖးဏွ္ အုိ၀္ မု္႓းအင္းတာင္ထုဂ္ဖႜဟ္ထင္း ေအးေဏ၀္.ဆု္ပႜယ္တ၀္ေဟွ၀္ေဟွ၀္႓း႓းမ ကဲထင္းမႝီ.အု္က်း အု္ဂုဏ္အု္တာမု္အွ္ေ၀့ဟွံင္ မု္ကဲထင္းေ၀့အု္အု္ေဟွ၀္ထုက္ အု္ဃွီ့လာထုက္ဆုိဒ္ေဖါဟ္လု္ဆ ုိဒ္အုိ၀္တာ. ေဍာဟ္ယွာ.ထင္းထ၀့္ေ၀့ဍး မု္ကဲတယ္ဏွ္လွ္။ဆု္ဃွီ့ဆု္လာအု္ဟွင္. ေဏ၀္.ဆု္ပႜယ္တ၀္လု္အွ္႓း ထီ့ခါန္.ဏွ္အုိ၀္ မြာဲဆု္ဖံင္ေဖႜ၀္အွ္ ထီ့ခါန္.သီး ဟု္လ၀္ေသွ္ေ၀့ေအးလွ္။

(ဃ) ဆု္ထင္းအုဲးထင္းဖး ဟွင္.ဆု္ဖံင္ေဖႜ၀္
႓းဆာင့္ေဍဆု္ထင္းအုဲးထင္းဖး ခ၀့္ ဆု္ဖံင္ေဖႜ၀္ဆု္ပႜယ္တ၀္အွ္ထီ့ခါန္.ဖုိင္ ဆုိဒ္ေဖါဟ္ကုိ၀္ဆုိဒ္ေဍဏွ္ ဆ္ုထင္းအုဲးထင္းဖးခ၀့္ဏွ္သီး ၾကဳိဒ္မု္႓းေဏ၀္.
ေ၀့ဆု္ဖံင္ေဖႜ၀္ဆု္ပႜယ္တ၀္ဏွ္လွ္။ဆု္ထင္းအုဲးထင္းဖး သီးယ္ုိ၀္ဏွ္ ဆုိဒ္ဆေဍထီ့ခါန္.ေ၀့ ဆု္ေလ၀္ထင္းေလ၀္ထ၀့ဖုင္ဏွ္အုိ၀္ေဖွ္ဟွာင္.ေဖွ္႓်ာေ၀့ကဲ႓းဟွ၀္.သုိ၀္ မႝီ.လု္ဟွာေ၀့ဆု္ထင္းအုဲးထင္းဖး ဆု္ဖၚဆု္မာလု္မိင္ဏွ္ လု္ဖႜဳံဃွာ.ဃွံင္လု္ဟွာအု္ဟွင္. ႓းထိက္ထသာ ေအလု္အွ္႓းစာ္႓ုိ၀္ အု္ေ၀့ကု္လုံ့ ဆု္ဖၚဆု္မာဏွ္ ၾကဳိဒ္မြာဲဟု္႓းယာထ ဖံင္းဃွိက္ထေ၀့ ေသွ္ေအးလွ္။
စင္႓ုိ၀္ ေ႓့လ၀္ဖႜဟ္ထ၀ယ္ လု္အု္ဖင့္ေခါဟ္အုိ၀္ အု္တုိင္သုိ၀္ ဆု္႓ီ႓ၚဟွင္.ေဍဆု္ဖံင္ေဖႜ၀္ဟွင္.သယ္ဏွ္အုိ၀္ ေအေဏ၀္.ဍဳဂ္ပါင္ယုိင္ဃွဳဦမ မႝီ.လု္ဟွာေဍလု္ဟွာ မြာဲအု္ေဟွ၀္ ၊ဆုိဒ္ေဖါဟ္လု္ဆုိဒ္ေဍလု္ဆုိဒ္မြာဲအု္ေဟွ၀္ ဆု္ဏးေသွ္ ဆု္သာမိင့္ေလာဟ္သာမု္အွ္ေ၀့ဍးဟွံင္ တု္တြယ္ထင္းစူး ဃွဴ့ဃွဴသၞ၀့္ ဖံင္းဖၚထင္းဆု္မာ မု္ကဲတယ္ေ၀့မြာဲ႓ုိ၀္လ္ွ။ ဆု္႓ီ႓ၚေဍဆု္ဖံင္ေဖႜ၀္သယ္ဏွ္အုိ၀္ ထံင္ပု္ထီ့ခါန္.ဖုိင္ယုိ၀္ ဟွဳင္.ခုိင့္ကဲလာ.ေ၀့ဆာ္။
စ၀္သာအာင္း (ထီ့၀ါန္.ရ၀္)